Artikull: Pse thone njerezit qe Bibla eshte e mbushur me kunderthenie e kontradikta?

AlbKristian.com - Faqe të Krishtera Shqiptare	Kryefaqja

Pse thone njerezit qe Bibla eshte e mbushur me kunderthenie e kontradikta?

Në rradhë të parë, kjo akuzë nuk ka të bëjë thjeshtë me të ashtu-quajturat kundërthënie apo kontradikta të Biblës. Mbi të gjitha ajo ka si qëllim që të vejë në dyshim besueshmërinë dhe vërtetësinë e Biblës si 'Fjala e frymëzuar e Perëndisë'. Pasi nëse Bibla është e mbushur me kundërthënie e kontradikta, atëhere ajo mbase nuk është plotësisht e besueshme dhe e vërtetë në gjithçka! Dhe nëse ajo nuk është plotësisht e besueshme dhe e vërtetë, atëhere mbase ajo nuk është e denjë që të quhet Fjala e frymëzuar e Perëndisë. Por kjo është shumë larg të vërtetës dhe prandaj kërkon sqarim dhe përgjigje bindëse e korrigjuese!

Atëhere, çfarë nënkuptojmë kur themi që Bibla është Fjala ‘e frymëzuar’ e Perëndisë? A është frymëzimi i barabartë me besueshmërinë dhe vërtetësinë e saj? Nëse 'po', atëhere si shpjegohen të ashtu-quajturat kundërthënie dhe kontradikta të Biblës? Këto janë disa nga pyetjet kryesore të cilave do të mundohemi që ti përgjigjemi në këtë artikull. Së fillim duhet që të sqarojmë disa nga çështjet bazë në mënyrë që të merremi pastaj në mënyrë më konkrete me disa nga arsyet kryesore për akuzat e ndryshme. Kuptohet që ne nuk kemi mundësi që ti përgjigjemi të gjitha akuzave specifike në këtë artikull, prandaj do të mundohemi që të japim sqarime mbi disa nga keqkuptimet dhe gabimet kryesore si dhe këshilla dhe sugjerime për zgjidhjen e tyre.

Historikisht, shumë njerëz janë munduar që ta hedhin poshtë besueshmërinë dhe vërtetësinë e Biblës në mënyra nga më të ndryshmet. Akuzat për kundërthënie dhe kontradikta të Biblës është një prej mënyrave më kryesoreve. Zakonisht kjo ka ardhur si rezultat i përpjekjeve të njerëzve të ndryshëm të cilët nuk kanë qenë të vullnetshëm që ta pranojnë atë si Fjala e Perëndisë. Kjo mbase ngaqë ajo bie në kundërshtim me bindjet dhe interesat e tyre të ndryshme (qofshin ato morale, shpirtërore, apo edhe fetare). Por njëkohësisht, jo të gjithë ata që kanë pyetje për Biblën, e bëjnë këtë me motive kundërshtuese pasi ka edhe persona të tjerë (qofshin ata edhe të krishterë) që me gjithë sinqeritet e kanë të vështirë që ti kuptojnë dhe përgjigjen këtyre akuzave. Ose sepse kanë pyetje të sinqerta dhe duan që të dinë më shumë në lidhje me të vërtetën.

Fatkeqësisht, vazhdimisht shumë njerëz mjaftohen me njohuritë e tyre të pakta mbi Biblën, ose i besojnë akuzave të atilla përshkak se nuk u intereson e vërteta, ose thjesht sepse përgjigjjet që kanë marrë i janë dukur të mjaftueshme. Por cilado qoftë arsyeja, çështja është kjo; si mund ti përgjigjen të krishterët këtyre akuzave të ndryshme?

Është e rëndësishme që të themi që për të krishterët, besueshmëria dhe vërtetësia e Biblës, nuk mbështeten në një besimin të verbër, por mbi të gjitha në bindjen llogjike që Bibla është Fjala e frymëzuar e Perëndisë. Tek 2 e Timoteut 3:16 thuhet, "I gjithë Shkrimi është i frymëzuar nga Perëndia dhe është i dobishëm për mësim, bindje, ndreqje dhe për edukim me drejtësi." Gjithashtu tek 2 e Pjetrit 1:21 thuhet që, "Asnjë profeci nuk ka ardhur nga vullneti i njeriut, por njerëzit e shenjtë të Perëndisë kanë folur të shtyrë nga Fryma e Shenjtë." Këto janë dy nga pasazhet më të rëndësishëm që flasin për natyrën e vërtetë (e frymëzuara) të Biblës.

Në këto pasazhe dhe ne pasazhe të tjera ne mësojmë që Perëndia i frymëzoi njerëzit e tij të shenjtë që të flisnin dhe shkruanin Fjalën e Tij të shenjtë. Prandaj, përpara së gjithash duhet të pranojmë që Bibla nuk është fjala apo shpikja e njerëzve, por në të vërtetë ajo është Fjala e frymëzuar e Perëndisë. Ai është Autori i saj i vërtetë, dhe kjo është arsyeja që të krishterët besojnë që ajo është e besueshme dhe e vërtetë. Pasi e kundërta do të ishte njësoj sikur të thoshim që Perëndia është autor kundërthëniesh dhe kontradiktash!

Sidoqoftë, ky artikull nuk ka për qëllim që të merret me frymëzimn e Biblës, por është e rëndësishe që të kuptojmë, që nëse ne e pranojmë që Bibla është Fjala e Perëndisë, dhe që Perëndia është autori i saj i vërtetë, atëhere llogjikisht edhe duhet të kuptojmë që ajo nuk mund të ketë kundërthënie apo kontradikta të pashpjegueshme pasi autori i saj nuk është i atillë. Ky aspekt i Biblës, pra frymëzimi i saj, shkon dora-dorës me besueshmërinë dhe vërtetësinë e saj.

Le të fillojmë atëhere: Tek Proverbat 18:17 thuhet, "I pari që mbron (ose paraqet) çështje e vet duket sikur ka të drejtë; por pastaj vjen tjetri dhe e shqyrton." Le ta lexojmë këtë varg edhe një herë duke e përshtatur: 'Kur dikush thotë që Bibla ka kundërthënie dhe kontradikta, në fillim duket sikur ai/ajo ka të drejtë, por pastaj vjen dikush tjetër dhe e shqyrton'. Qëllimi i këtij artikulli është shqyrtimi i disa prej arsyeve dhe akuzave kundërshtuese.

Së pari, le të themi që megjithëse akuzat kundra Biblës janë të shumta shumë studjues dhe besimtarë të krishterë të aftë i kanë shqyrtuar ato me kujdes dhe kanë treguar në mënyrë të vazhdueshme dhe bindëse që Bibla është plotësisht e besueshme dhe e vërtetë. Megjithatë, fatkeqësisht shumë prej kritikëve të Biblës as që interesohen që ta kërkojnë të vërtetën deri në fund, pasi zakonisht mjaftohen me arumentat kundërshtuese ose thjeshtë i neglizhojnë argumentat e mbrojtjes.

Së dyti, duhet të kuptojmë që ky proçes shqyrtimi i akuzave të ndryshme kërkon kohë, njohuri, studim dhe pregatitje paraprake, dhe jo çdo i krishterë i ka të gjitha këto mundësi dhe aftësi. Fatkeqësisht, shpesh herë kjo pamundësi e këtyre të krishterëve është interpretuar prej kritikëve të Biblës, si një vërtetim i akuzave të tyre. Por, mungesa e njohurive dhe pregatitjes së disa të krishterëve nuk nënkupton mungesën e një sqarimi apo përgjigjeje bindëse dhe të vërtetë!

Së treti, duam që ti përgjigjemi një akuze që vjen nga ata njerëz që mund të kenë parë disa libra apo materiale të cilat mundohen që të tregojnë kontradiktat e Biblës. Por e vërteta është që megjithëse mund të ketë plotë libra dhe materiale të atilla shumë kritikë e neglizhojnë ose nuk e konsiderojnë mundësinë dhe të vërtetën që ka po aq shumë (mbase më tepër) libra dhe materiale që i përgjigjen argumentave dhe akuzave të tyre. Fatkeqësisht, jo çdo kush ka mundësi ti gjejë kollaj ato, por problemi më i madh është neglizhenca. Vallë çfarë do të thotë kjo? Mbase jo shumë, por prandaj edhe ne duam që t'ju inkurajojmë që të mos të hiqni dorë kollaj nga kërkimi dhe studimi juaj. Kur diçka është e pashpjeguar kjo nuk do të thotë që ajo nuk ka shpjegim ose që nuk do të shpjegohet në të ardhmen. Nëse shkencëtarët nuk do të kishin vazhduar kërkimin dhe studimin e tyre për të kuptuar dhe mësuar dukuritë e pashpjeguara të natyrës dhe jetës, atëhere shumë prej gjërave që ne i dimë dhe i kuptojmë sot do të vazhdonin që të ishin të pashpjeguara (dhe shkencëtarët do ishin pa punë)!

Së katërti, ne duhet që të jemi kërkues të vullnetshëm deri në fund, pasi ka shumë raste kur me zbulimet apo studimet e tyre, studjuesit kanë parë që gjërat që ata mendonin që ishin kontradikta apo kundërthënie në Bibël, në të vërtetë ishin një keqkuptim, keqinterpretim, ose thjesht një mungesë informacionesh. Kjo është një nga arsyet pse edhe ne duhet që të jemi shumë të kujdesshëm në marrjen e vendimeve të shpejtuara pa njohuri të plota, pasi është shumë e kollajtë që ato të jenë të shpejtuara dhe pak të bazuara! Historia, arkeologjia, dhe shkencat e tjera vazhdojnë që të na tregojnë në mënyrë bindëse që Bibla është e vërtetë dhe e besueshme.

Së pesti, duhet të trajtojmë një problem të rëndësishëm. Një shprehje e njohur shkon kështu, "Një tekst pa kontekst bëhet pretekst." Ky mbase është një nga gabimet më të mëdhaja që akuzuesit e Biblës bëjnë. Për shembull, Bibla thotë, "Nuk ka Perëndi" (Psalmi 14:1). Kjo bie plotësisht në kundërshtim dhe është një kontradiktë me mësimet e të gjithë Biblës. Por konteksti i vargut të plotë thotë "I pamendi ka thënë në zemër të tij: "Nuk ka Perëndi" (Psalmi 14:1). Ky është një shembull shumë i thjeshtë i këtij lloj gabimi të kritikëve të Biblës.

Besueshmëria dhe vërtetësia e Biblës nënkuptojnë që kur të gjitha faktet janë të njohura (bëhen të ditura), Shkrimet sipas autografave origjinale, të interpretuara drejtësisht do ta tregojnë vetveten plotësisht të vërteta dhe të besueshme në gjithçka që ato pohojnë, në lidhje me doktrinën, moralitetin ose me shkencat sociale, fizike e jetësore, etj. Kjo shprehje besimi nuk është një shpikje e të krishterëve, por një bindje dhe besim llogjik i vërtetuar nga historia dhe i pranuar gjerësisht.

Autor: Elvis Plaku

Adresa elektronike: elvis©albkristian.com (kuptohet që përpara se ta nisni mesazhin duhet ta ndryshoni © me @)

U ndryshua më: 12 Maj, 2003.

Kthehu tek faqja: Apologjia