Artikull: Historia e Lindjes se Mormonizmit

AlbKristian.com - Faqe të Krishtera Shqiptare	Kryefaqja

Historia e Lindjes se Mormonizmit

Kisha e Jezus Krishtit e Shenjtorëve të Ditëve të Fundit nisi në fillim të shekullit të 19-të gjatë lëvizjes amerikane të ringjalljes fetare të quajtur Zgjimi i Dytë i Madh. Rreth vitit 1820, sipas tregimit të atij vetë, kur Jozef Smith ishte 14 vjeç dhe jetonte me familjen e tij pranë qytetit Palmira, në Nju Jork, ai pati një vizion të Perëndisë Atë dhe Jezus Krishtit, që e informonin atë se në Tokë nuk ishte kisha e vërtetë.

Gjatë atyre viteve, Smith punoi në fermën e të atit dhe zhvilloi idetë e tij fetare, i frymëzuar nga takime të tjera të mbinatyrshme. Pas 1827, përsëri sipas tij, ai vizitoi çdo vit një vend ku ndodhej një libër i shkruar me shkrim hieroglifesh mbi pllaka floriri të groposura në një kodër aty pranë; ai thoshte se vendi i librit i ishte treguar nga një engjëll. Më 1830 ai përfundoi përkthimin e këtyre pllakave, “nëpërmjet dhuntisë dhe fuqisë së Perëndisë,” dhe botoi Librin e Mormonëve, që ai mendonte se ishte një tregim fetar i banorëve të hershëm të Amerikës Veriore. Plakat më pas u zhdukën; sipas Smithit, pas përkthimit ato u morën nga një engjëll. Libri i Mormonëve tregon historinë e emigrantëve të hershëm nga Jerusalemi në Amerikë. Të udhëhequr nga profeti Lehi rreth vitit 600 p.e.s. ata u vendosën në Amerikë, u rritën në numër, themeluan një shoqëri të qytetëruar, u ndanë, ndonjëherë u degjeneruan, dhe bënë një sërë luftërash. Pas kryqëzimit të tij, Jezus Krishti iu shfaq në trupin e tij të ringjallur njerëzve të Botës së Re. Sidoqoftë, më shumë sesa thjesht një tregim, libri është i mbushur me mësime fetare që theksojnë veprimin e lirë të njerëzimit dhe fatin e Amerikës si vendi i zgjedhur. Në 6 Prill, 1830, Jozef Smith organizoi Kishën e Krishtit që shpejt u njoh me emrin e tanishëm - Kisha e Jezus Krishtit e Shenjtorëve të Ditëve të Fundit.

Tradicionalisht thuhet se organizata e kishës është themeluar në qytetin Fajet, Nju Jork. Brenda një viti, në fillim të vitit 1831, qendra lëvizi në Kirtland (tani Kirtland Hills), Ohajo. Në pothuaj të njëjtën kohë, u ngrit një koloni tjetër Mormone në Misuri, në fillim në një zonë rreth qytetit Indipendens, që ishte përcaktuar nga Smithi si vendi ku do të kthehej Jezus Krishti. Në të dy zonat pati shumë të konvertuar. Megjithatë banorët e mëparshëm të këtyre vendeve u armiqësuan me Mormonët, të cilët shpejt u përballën me kërcënime dhe më pas me përndjekje të dhunshme. Më 1839 Mormonët filluan të largoheshin nga Kirtlandi dhe më pas edhe nga kolonitë e Misurit dhe u vendosën në brigjet e lumit Misisipi në Komers, Illinois, zonë të cilën e quajtën Novu. Feja vazhdoi të tërhiqte të konvertuar të tjerë, shumë prej të cilëve ishin nga Anglia. Që turmat të mos i përzinin përsëri, Smithi dhe shokët e tij morën leje nga legjislatura e Illinoisit që të formonin një milici lokale, Legjionin Novu, e cila në fakt ishte një ushtri private. Kolonia Novu u rrit duke arritur një numër prej më shumë se 12,000 banorësh në 1845.

Në fillim të viteve 1840, armiqësimi u intensifikua me marrjen e një pushteti monarkik nga ana e Smithit dhe sipas fjalëve, që në fillim u mohuan zyrtarisht, por që më pas u konfirmuan, se Mormonët po fillonin të praktikonin poligaminë. Në 1844 Jozef Smithi dhe i vëllai Hirum u futën në burg në Kartaxh, Illinois, me akuzat e tradhëtisë dhe komplotit. Më pas, megjithë premtimin për sigurinë e tyre që u kishte bërë guvernatori i Illinoisit ata u vranë nga një turmë njerëzish.

Sot në botë janë rreth 11 milionë anëtare të kësaj feje nga të cilët 5 milion janë në SHBA.

Pershtati dhe pregatiti nga Encarta: Skerdi Hoxha

Kthehu tek faqja: Mormonet